MMOJA AJINYONGA MWINGINE MATATANI MWA POLISI IRINGA

Mtu mmoja afariki dunia na mwingine kushikiliwa na jeshi la polisi mkoani Iringa katika matukio tofauti likiwemo la mtu asiyefahamika kwa jina kukutwa amefariki dunia mara baada ya kujinyonga kwa kutumia kamba ya miti iliyopo kwenye korongo.

Akizungumza na mtandao huu wa www.mwandishiwetublog.com ofisini kwake Kamanda wa polisi mkoani hapa Ramadhani Mungi alithibitisha kutokea kwa tukio hilo lililotokea mnamo tarehe 21 mei majira ya saa 6 Mchana huko maeneo ya kijiji cha Kitelewasi kilichopo kata ya Mbalamaziwa wilaya ya Mufindi.

Kamanda alisema marehemu ambaye jina lake halikuweza kufahamika ila ni jinsia ya kiume aliyekadiriwa kuwa na umri wa miaka 17-21 alikuwa amejinyonga kwenye korongo la Ndengemakwaya na kusema chanzo cha tukio hilo bado kinachunguzwa.

Wakati huohuo, askari wakiwa doria walimkamata mfanyabiashara aliyefahamika kwa jina la Happines Charles (25) mkazi wa Mawelewele akiwa na dawa za kulevya aina ya bhangi kete 97 zikiwa kwenye mfuko mweusi.

Tukio hilo lilitokea mnamo tarehe 21 mei huko maeneo ya Makorongoni na kusema mtuhumiwa huyo alikutwa na dawa hizo baada ya kufanyiwa upekuzi kwenye duka lake huku chanzo kikiwa ni kipato kidogo.

 

NA DIANA BISANGAO WA MATUKIO DAIMA.COM, IRINGA